長沙灣：亂棄建築廢料 恐生車禍
「成大堆垃圾放咗喺馬路咁耐都冇人清，泥頭、單車、樹枝乜都有！」呂小姐早前行經長沙灣永隆街與青山道交界，發現行人路與部分馬路被棄置大量建築廢料，由於附近為巴士站，擔心巴士行經時，會被廢料刺穿輪軚造成危險，「今次就好彩冇事發生，萬一發生意外咁就太遲啦！」
長沙灣永隆街與青山道交界被棄置大量建築廢料。
路政署發言人證實，派員實地視察時發現行人路有棄置建築廢料，已通知相關執法部門，並提醒鄰近物業管理處勿於行人路棄置建築廢料，有關廢料其後已被移除。
呂小姐指該區經常有建築廢料被人棄置路邊，認為路政署僅清理廢料及提醒附近管理處未能有效阻嚇棄置者，「唔係清咗就算，而係要搵出丟嗰個人再罰佢，咁先有阻嚇力！」呂小姐又要求當局與環保署合作，若發現有人傾倒廢料須即時執法。
