師者,傳道、授業、解惑也。可惜今時唔同往日,家陣香港七國咁亂,教育正正係亂象嘅根源之一。唔係咩,唔少老師不務正業,濫竽充數,搞到政治入侵學校唔在講,就算學子不受引誘專心讀書,一樣係愈讀愈糊塗,愈讀愈迷惑,直情係誤人子弟吖。

有辦你睇,職業訓練局轄下嘅香港專業教育學院,每年獲得政府二十億元資助,數目唔少o架,照計資源充足,教育水準應該有番咁上下啩。哈,原來事實恰好相反。本報踢爆,該局轄下嘅香港教育學院(黃克競)酒店、服務及旅遊學科高級文憑課程,英文科教材甩甩漏漏,錯誤連篇。例如教材列明學生需回答以下兩條問題,實際竟然有三條問題;又如要求學生就「太陽油」嘅解說作答,點知提供嘅資料竟然變成「旅遊保險」;仲有呀,有題目指出講者係「Kristy White」,但最後居然變成「Calvin Hall」。成份教材上文不接下理,漏洞百出,明顯係胡亂拼貼而成,咁都得?

喂,堂堂專上學院喎,竟然推出連小學雞水平都不如嘅教材,學生一頭霧水之餘,英文又學唔好,簡直累人累物喇。有資深英文科老師睇唔過眼,直指該份教材「揦西」到冇朋友,質疑編寫教材嘅老師蛇得就蛇,懶得就懶,根本冇自己重睇一次就派畀學生。職訓局教學人員協會都加把口鬧埋一份,直斥用咁多公帑出啲垃圾教材畀學生,唔止浪費公帑,直情虛耗學習光陰呀。

證據確鑿,校方應該認衰道歉改正喇啩,點知校方大耍太極,竟然聲稱只係負責轉發教材,成個關人個關咁款。咁卸責嘅說話都講得出口,你話嘞,校方冇承擔,點擔得起春風化雨作育英才嘅責任吖。

話時話,校方「揦西」又求其,卸責又賴皮,固然係不知所謂,但職訓局一樣責無旁貸嘅咋。如果唔係該局冇監冇管,放任自流,又點會鬧出呢啲低級笑話吖。搞成咁,職訓局有乜解釋呢?發言人話喎,有關教材只係初稿,職員唔小心誤發予導師及學生,先至搞出呢個大頭佛。咁就好笑嘞,初稿竟然當定稿派發,唔係失職係乜呀?再講吖,初稿都甩漏成咁,定稿都唔慌好得去邊,解釋根本係掩飾咋。

講到底,學校係傳道授業解惑嘅地方,如果學校其身不正,職訓局是是但但,教育局胡混度日,學生點會有前途?香港又點會有未來呀?叮!

第一手消息請下載on.cc東網iPhone/iPad/Android/Windows Phone Apps