曾積極推動「國民愛國教育」，又於兩年多前公開誓言不會再加入香港特區政府做官的貴婦人，前日在一個電台節目話，依家香港移民外國的人數激增，佢「引述」「佢朋友」說，原因乃係「並非怕咗共產黨，而係怕了年輕人」喎！

學民思潮的黃之鋒回應，佢朋友可以「移民到一個無共產黨嘅地方，但不能移民到一個沒有年輕人的地方」。秒殺之。

要移民的原因多得很，上世紀五十年代初，有好多海外華人看好中國共產黨，紛紛「移居」故土，「回家」建設祖國，結果係點？大家不要被外國媒體勢力誤導，以為佢哋好慘至得o架！在當年餓唔死、又鬥唔死的，佢哋嘅下一代，今日不知幾風光，可以去法國踎喺羅浮宮門口浸腳，又可以爬上英國西敏寺頂樓牆上刮番個「到此一遊」的刻記，為國爭光哩！哼！美國？睇佢哋唔上眼啦！幾百年都出唔到一個土豪！無鬼用！年輕人不知幾巴閉呀！尤其是強國的！

真正值得移民的原因，係一個廢柴政府好似垃圾崗咁，畜養埋一棚無恥無知無誠信無品格，兼無認受性無朋友嘅高官，因呢類劣質粉皮才令到政府無能無法去管治好一個社會。當無啖好食無希望時，人民點會唔走？

鄰近地區國家的領導人子女，多是「外籍人士」，是佢哋父母有遠見？定係年輕人接觸外界多了！受到外國勢力薰陶？還是受國際標準的核心價值影響呢？

人老了！保住棺材本，可以食到尾便是！但年輕人點呢？他們需要一個有明天的世界，可以發揮所長的天地、有公平公正公義的烏托邦啫！咁都係錯？嚇親你？再卑微啲，佢哋可唔可以有個長治久安嘅環境，建立自己理想安樂窩呢？無人想日日瞓街o架！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

第一手消息請下載on.cc東網iPhone/iPad/Android/Windows Phone Apps