政壇：泛民3招阻截剪布「人」
話說立法會財務委員會上周五審議環境局局長「星星」黃錦星提交嘅「三堆一爐」撥款申請，喺夜晚七點幾鐘，主席Tommy張宇人趁泛民主派少人時手起刀落「剪布」，話本周五先至畀輪候名單上嘅四位議員發言，之後就會進入表決環節，又要求議員喺今日下午五點前向秘書處提交所有修正案，否則逾期不會受理。泛民議員批評Tommy剝奪議員發問權利，又諗定三招準備對付Tommy，總之唔畀「三堆一爐」順利通過。
張宇人「剪布」惹來泛民議員不滿投訴。（資料圖片）
據聞有泛民議員已經去信秘書處投訴Tommy，批評佢以確保會議順利進行為由「剪布」嘅理由並唔合理，又話佢喺會議法定時間過後先宣布叫議員提交修正案，已經違反《議事規則》。而人民力量議員已準備提交過百項修正案，聲言要班建制派議員投票投到手軟喎。
新民主同盟議員范國威亦透露，佢會聯同其他泛民議員再喺周五嘅財委會會議上爭取發言，批評Tommy嘅裁判無理，希望阻得一時得一時，等「三堆一爐」無咁快可以進入表決環節。
