政壇：佔中被捕者六成想鬆人
呢排好多團體都先後公布有關佔領行動嘅民意調查結果，當中唔少都顯示受訪者認為佔領行動影響民生同經濟，同時，認為佔領人士應撤離佔領區嘅受訪者比率不斷上升，但係至今仲未見到有退場嘅迹象喎。
設計圖片及對白
話說警方上月中喺金鐘龍和道清場時，被部分佔領人士同聲援市民投訴過分使用武力。由立法會社福界議員張國柱出任會長嘅香港社會工作者總工會（社總），尋日就喺金鐘佔領區公布當日向涉嫌衝擊龍和道被捕人士做嘅民意調查，結果指大部分受訪者批評警方濫用暴力，又話事發後面對極大心理陰影，部分人更加話想離開香港添！聽落真係得啖笑。社總只係邀請當日龍和道被捕人士進行調查，得出一面倒嘅結果根本不足為奇。
有受訪者稱發噩夢失眠
社總喺龍和道清場後訪問咗二十五位被捕人士，當中超過九成批評警方不恰當使用武力，十四位受訪者投訴曾經被警方毆打。四成受訪者話至今仍有不時諗起事件，有人仲話不時發噩夢同失眠，令情緒大受困擾。而超過一半受訪者對香港未來失去希望，更有多達六成受訪者話想移民離開香港添！
佔領人士口口聲聲話佔領道路係要幫香港爭取民主，但違法始終係違法，加上持續近兩個月嘅佔領行動影響深遠，香港搞到一團糟，但佢哋依家竟然話要離開香港，究竟係真心為香港未來着想，定係想攪亂香港後「鬆人」呢？不過，佔領人士會唔會喺佔領行動結束後被檢控、甚至留案底都未知，所以攞唔攞到香港「良民證」申請移民都成問題呀？
