宿位僧多粥少 老有所養齋噏

講多無謂，數字最實際。日前發表嘅審計報告披露，目前超過三萬名長者輪候緊資助宿位，上年度有五千七百名長者輪候期間離世，而一○年前輪候期間離世嘅長者每年只有四千至四千五百人，家陣老人家平均要等三年至有位，你話係咪淒涼吖。

點解搞成咁？社署調配資源失當係其中一個原因。審計報告指出，目前全港有一千八百個非政府機構資助宿位閒置，建議社署收回呢啲宿位作中央輪候編配。即係咁，家陣宿位咁緊張，善用資源的確有必要，但係對於三萬輪候大軍嚟講，一千八百個位杯水車薪都講唔上，純粹得啖笑咋。

話時話，資助宿位供不應求已經唔係今時今日嘅事，各界曾就增加供應提過唔少建議，包括利用丟空嘅政府物業辦院舍等，弊在市民急政府唔急，資助宿位近十四年只係增加咗兩成，遠遠追唔上需求。有人話齋，政府可以為私營院舍提供誘因，鼓勵佢哋改善服務，令老人家多啲選擇，減輕資助宿位輪候壓力。呢項建議本來係唔錯嘅，但唔好唔記得，私營安老院有好多雜費跟尾，基層長者未必負擔得起。講嚟講去，資助宿位供應一日唔增加，講乜都係假。

俗語話，家有一老，如有一寶，但喺港府眼中，長者唔單止係草，直頭係負擔。好似「居家安老」計劃咁吖，美其名尊重長者個人意願，但咩配套都冇，即係叫公公婆婆食自己啫。更離譜嘅係，港府增加本地宿位冇符，居然北上買位，推老人家返內地自生自滅，唔止縮骨，直頭涼薄。

講開又講，宿位不足只係長者問題其中一環啫。係人都知，香港人口老化，全民退休保障勢在必行，社會亦早有共識，可惜港府拖得就拖，拖唔落去就玩卸膊，委託學者做研究報告，由得社會各界爭議不休，加上家陣佔領行動搞到七國咁亂，經濟民生無人問津，更加唔使旨意港府主動承擔。

古人教落，老吾老以及人之老，不過對於薪高糧準嘅高官嚟講，睇怕都係對牛彈琴o架嘞。佢哋自己無後顧之憂，又點會理其他人死活吖，長者想老有所養，老有所依，都係自求多福好過咯，叮！