「老老豆豆」呢個潮語同老竇完全無關，呢個潮語嘅意思竟然係「老老實實」！到底點解「老老實實」會變咗「老老豆豆」？應該係啲網民貪玩之作。點解係「老豆」而唔係「老爺」、「老媽」、「老弟」、「老兄」……真係不得而知。不過好多潮語其實都係由一時貪玩開始，跟住傳吓傳吓，就變成咗一句常用嘅詞語，同網絡上好多其他嘢一樣，無需太多思考與考究，都係嗰句：認真便輸了。

中國人非常鍾意認親認戚，彷彿如果同你有親，就咩事都容易話為啲。又唔知幾時開始，香港要叫中央做阿爺。阿爺又唔一定錫個孫，又唔見得所有阿爺都一定係好人，至多係阿爸個阿爸嘅關係，係咪阿爺就一定有好嘢益我？呢個就真係不得而知。不過觀乎本土歷史，阿爺喺上世紀五、六十年代物資短缺，因韓戰經濟被美帝制裁，兼且毛帝將國家變成個人實驗場，搞到全國窮到爆廠。於是做「孫」嘅香港，不斷接濟呢個貧窮嘅「阿爺」。後來改革開放，香港人又不斷將資金同技術貢獻阿爺，如果中國真係香港嘅阿爺，我諗呢個所謂嘅「孫」都算得上係相當孝順。但我睇唔透嘅係，如果中國係阿爺，咁邊個至係香港嘅阿爸呢？「老老豆豆」香港有今時今日嘅繁榮，又係拜邊個所賜嘅呢？英國人經營香港一百六十年，都可以叫做「老豆」，但係阿爺中共喺一九四九年才建國，點解「老豆」又會老過阿爺嘅呢？

不過講開網絡嘅嘢，係咪真係需要認真看待？好似早輪有示威者衝爆立法會嘅玻璃，警方高調拉人，有啲係涉嫌網上教唆他人犯法。香港不經不覺已經去到以言入罪嘅地步，特區政府嘅文字獄程度，開始與強國睇齊。「老老豆豆」呢啲又算唔算白色恐怖呢？仲有一啲號稱「國師」嘅人物，不斷叫人拆金鐘示威區大台，有啲又叫人勇武抗爭，呢啲又使唔使認真看待呢？

第一手消息請下載on.cc東網iPhone/iPad/Android/Windows Phone Apps