政壇：聞到佔中有(火羅)味郭榮鏗劃清界線

佔領行動被指衝擊法治，泛民政黨支持度插水，公民黨（公文袋）更首當其衝，該黨手握嘅法律界席雖為泛民鐵票倉，近日都開始岌岌可危，「變天」可能大增，綜合各方消息指，公文袋嘅主張原本喺業界同青年一輩好有吸引力，但經歷今次佔領行動後，原來以公民抗命方式爭取民主，或可能犧牲法治，因此Dennis身為業界代表，一直身體力行唔敢同歪理連篇嘅泛民法律界中人「跟車太貼」，一來於佔領區出現都係以法律代表名義現身，二來好少現身佔領記者會，似乎做好晒劃清界線嘅準備。九七回歸後，法律界議席一直係泛民天下，主要原因適逢法律界開放，律師數目大增，由原本二、三千人增加至六、七千人，加上新增嘅大多數都較為年輕，取態自然較傾向泛民。不過，年輕律師漸趨成熟後，思考問題都多角度咗，料泛民同建制在法律界嘅比率已由過往七三比，降至約為六四比，泛民中人唔驚就假。