政壇：議員現身兒童議會
兒童議會尋日舉行兒童教育政策辯論，除有六十九名「兒童議員」外，出奇地有十位立法會議員出席同參與討論，當中仲包括榮登「立法會大懶蟲」三甲之列、甚少出席立法會會議嘅「怪醫」醫學界議員梁家騮。三項議案辯論中，其中一項係有關提升兒童喺制訂教育政策時嘅參與度，有兒童議員提出政府擬定政策時應該聽取兒童意見，但就被反對動議嘅兒童議員反駁，如果學生唔想做功課同考試，學校係咪就要取消？
劉慧卿（前左）同梁美芬（前右）都有出席兒童議會會議。
議員劉慧卿就覺得，如果學生真係唔想考試，而大部分人都覺得考試係對兒童唔好嘅話，咁點解大人仲要執行呢？卿姐咁講，唔通佢細個時都唔鍾意考試，所以支持學生唔使考試？卿姐就話，雖然佢好耐冇讀書，但佢從來都唔怕考試。
