政壇：發叔引古訓點醒林偉強
沙田鄉事委員會獲政府以象徵式租金，批出鄰近沙田火車站靚地建新會址，更邀請鄉議局主席劉皇發（發叔）、副主席張學明及林偉強出席新會址動土儀式。發叔致辭時特別提起「佔中」，並引用宋代司馬光《資治通鑑》「人心不搖，邦本自固」，寄語原居民要安分、理性，唔應該隨波逐流、破壞基石。咦？呢句話講畀邊個聽呢？在場嘅林偉強日前先號召村民「佔領」北角政府合署大門，發叔呢個訓示，係咪向苦海中嘅林偉強拋救生圈呢？
設計圖片及對白
落人口實惹非議
我哋日前報道過，林偉強喺第二輪反佔中簽名運動獨領風騷，以收集共六千個簽名冠絕新界二十七鄉；但話口未完，林偉強日前為抗議政府將鎖羅盆、海下及白腊三村部分土地納入郊野公園範圍，號召村民到北角政府合署踩場靜坐，兼紮營通宵「佔領」合署門外。
雖然林偉強話，擺放帳篷只係用來儲存物資同擋風，唔認係「佔領」政府合署，但佢喺敏感時刻隨處紮營，好難唔予人感覺「有口話人，冇口話自己」喎。而且，呢條紮營抗規劃嘅橋，擺明係抄佔領行動嘅橋啫。有人話，此風不可長，唔係第日市民有乜抗議、不滿，就學人佔領，咁政府大小部門冇日安寧都似。
唔知係咪咁，發叔尋日嘅致辭就格外引人關注，仲聯想佢喊話嘅對象似乎不但係佔領人士，仲藉勉勵鄉事人勿隨波逐流，而暗批建制中人勿破壞基石，唔知林偉強又收唔收到呢？講番尋日動土儀式，沙田鄉委會主席莫錦貴笑到見牙唔見眼，佢致辭時亦賣口乖感謝鄉議局出面幫忙，所謂「大樹好遮蔭」，話冇鄉議局就冇呢塊靚地喎，真係夠晒安分、理性。
