管樹政出多門 官僚互相卸責

唔講唔知，目前負責管理樹木嘅政府部門有八個之多，每年開支多達四億元，可惜人多唔係好辦事，反而好累事。審計署嘅衡工量值報告係咁講嘅，樹木辦喺全港路邊普查中發現七萬棵樹「無王管」，其中一千三百棵有問題，點知花咗三個月仍未能確定呢啲樹由邊個部門負責，導致依家仲有十六棵病樹未能移除。你話嘞，港產官僚關人個關，危樹冇人理，有乜法子唔頻頻搞出人命吖。

至弊係，港產官僚走馬觀花，就算驗樹都係求求其其。好似地政總署咁吖，早前係威係勢進行樹木風險評估檢查，可惜淨係靠肉眼觀察，做騷咁做，好多危樹根本驗唔到，求其交差算數，簡直攞市民生命安全較飛。

審計報告建議發展局局長統籌各個樹木管理部門嘅工作，加快檢討路邊樹木護養政策，並劃分護養責任喎。其實，港府幾年前已成立樹木辦，主要就係負責協調各部門嘅樹木管理，但搞到依家仲有咁多樹無王管，真係服咗佢。鬼咩，一個和尚擔水食，三個和尚冇水食，樹木管理政出多門，權責不清，最叻就係互扯貓尾推卸責任，樹木辦淨係負責政策，各個部門唔聽佢支笛，管鬼管馬咩。正如有樹木專家話齋，管樹責任爭議已經存在幾十年，問題一直未解決，實在令人驚奇。

講到驚奇，樹木辦真係夠晒經典。早前中環半山冧樹造成一屍兩命慘劇，樹木辦成為眾矢之的，申訴專員公署主動介入調查，結果踢爆樹木辦多宗罪，包括冇妥善處理有關樹木安全嘅投訴、冇好好統籌相關部門嘅樹木管理工作、監管失職、權責不清等等。可惜吖，你有你批評，佢有佢卸責，直到今日，樹木管理一樣係漏洞多多，毫無改善。

話時話，港府成立樹木辦使咗唔少錢，結果一事無成，簡直冤哉枉也。既然呢個衙門形同虛設咯喎，不如索性摺咗佢，慳番公帑好過喇。講到底，如果港產官僚唔改變敷衍塞責、得過且過的作風，無論審計署點樣發表報告，都係對牛彈琴嘅咋，叮！