「大台」就係指喺金鐘佔領區，海富橋底下嘅大型高台，一般示威者叫嗰度做「大台」，平時係畀啲有頭有面嘅領導人物上去發言，號召群眾，例如係「雙學」，即係「學民思潮」同「學聯」，同埋「三子」，即係陳健民、戴耀廷同朱耀明牧師呢三位佔中發起人，當然唔少得大量平時活躍於「和理非非」式遊行嘅社運分子。有一啲示威者指「大台」嘅人士企圖騎劫雨傘運動，以至形容「大台」係一班人，而非一個實體舞台，甚至祭出「不要大台領導」嘅口號，更甚是聲言要拆走「大台」！

由「魔童」王維基領導嘅香港電視日前正式啟播，我由於家居科技落後，以致仲未有機會睇到。但身邊好多朋友已經不斷喺社交媒體「洗版」，大呼好睇，有啲激進啲嘅仲話CCTVB可以執笠收檔。到底係新屎坑三日香定係真係出類拔萃就有待時間去證明，但係新電視台面世，始終對觀眾嚟講都會有份新鮮感。CCTVB一台獨大咗咁多年，有人挑戰佢「大台」地位，對大眾嚟講都係一件好事。王維基早於搞電訊嘅時代，已經玩開「大衞挑戰巨人歌利亞」，不嬲都熱衷向巨人大財團挑機。猶記得當年佢嘅CTI城市電訊，幾年間重新建立咗電訊市場嘅新秩序。以小勝大以弱勝強嘅關鍵，從來就只有一條路，就係創意行先。同博弈一樣，令對手永遠唔知你下一步係乜；又例如盲拳點解可以打死老師傅一樣，原因就係「你估我唔到」。套用番喺依家嘅運動，點解令人束手無策，就係因為年輕人嘅下一步，唔係「大台」嘅人可以估得到！

講咗咁耐「大台」，其實乜嘢先至係「大台」？TVB係「大台」定係PCCW係「大台」？定係商業電台先係「大台」？查實潮語所謂嘅「大台」係喺佔領行動後先至出現嘅名詞。以前「大台」通常係指電視業嘅最大壟斷者TVB。但係今時今日就係指喺社會運動中發號施令嘅大型舞台。

所以今時今日潮語「大台」並非係一個台，而係一幫人。呢班人係人係鬼？咁就留番畀大家自行判斷。

第一手消息請下載on.cc東網iPhone/iPad/Android/Windows Phone Apps