政壇：搞搞政：柴油發電機傳惡臭 胡志偉議辦闖禍
泛民立法會議員經常被批濫用議辦，試過梁國雄（長毛）嘅議辦引發火警，好彩大樓內嘅自動灑水系統將火撲熄，但就連累其他議員辦公室水浸；亦有議員將議辦地點當酒店，開放予佔領人士睡眠；前日就輪到白鴿黨議員胡志偉，佢喺議辦開柴油發電機，釋出陣陣濃烈臭味，搞到其他人以為火警，仲驚動保安添！議員消防安全意識薄弱，秘書處惟有出招，尋日邀請議辦提名職員擔任消防保安主任，同秘書處協調消防安全事宜。
設計圖片及對白
疑惹火警 驚動保安
胡志偉究竟搞咩花樣呢？原來佢近日花二、三千元購買咗部發電機，打算喺搞活動時使用，佢喺議辦內試機，好衰唔衰，懷疑機件故障而發出陣陣濃烈臭味，四散到其他議辦，令大家誤以為發生火警，仲驚動埋保安上樓巡視添。不過，胡志偉只係話會攞部發電機去維修，連道歉都冇句。
秘書處尋日就去信邀請議辦，提名一位職員擔任每個議辦嘅消防安全主任，同埋提名至少兩名職員擔任聯合議辦嘅消防安全主任，以負責同秘書處物業及保安組協調有關大樓嘅消防安全事宜。秘書處嘅做法就好似學校叫「壞學生」做風紀一樣，有冇效？真係好難講，分分鐘無人參加令計劃爛尾都未定。
