政壇：中總女會員將有專屬會巾
香港中華總商會（中總）前晚舉行就職典禮晚宴，當晚冧莊會長嘅楊釗與一眾副會長、常董、會董齊齊打紅底銀花的煲呔同領呔，一致又搶眼。副會長莊學山話，佢留意到男會員個個都有會呔做「嘜頭」，唯獨女會員無特定服飾，以致出席重要場合時，未能凸顯主人家身份，於是提議為女會員設計專屬絲巾，聽講好多女會員都贊成。
中總選任會董羅頌宜（左起）、楊燕芝及周雯玲，不久將來可戴上代表中總嘅絲巾。
一班中總領導層都有一致搶眼嘅會呔，王國強（左起）、盧文端、莊學山、袁武、楊釗、李德麟、林樹哲、曾智明及馬忠禮。
聖誕將至，梗係要問吓身兼康泰旅行社總經理嘅中總選任會董黃進達（Jason）下月嘅旅遊市道，佢話近期日圓跌至新低，整體生意不過不失。不過，Jason話自從日本海嘯之後，好多客都鍾意去大阪自由行，揀跟團去日本嘅客就明顯減少。問到Jason會唔會親自帶團搵新景點，佢講笑話老婆一定唔肯，因為工作同玩要分開喎。
講開旅行，立法會議員蔣麗芸（Ann）丈夫、中總常董梁海明就預告，佢哋今年都會去旅行，但就唔會再坐郵輪喎，唔知係咪被今年初阿Ann做「旅霸」佔領郵輪事件嚇怕咗呢？梁海明話，當日在尖沙咀海運大廈外佔領嘅歌詩達郵輪「維多利亞號」，明年一月又來香港，但今次佢兩公婆已經唔再係船上客。
