政壇：岑智明急為「獅子山月曆」解圍
年尾到，天文台尋日率先向傳媒派發天文台2015年月曆，封面相係以近期大家都掛在口邊嘅「獅子山」做背景，張相名為「獅子山下雲光夜影」，由於背景一片泛黃，令人聯想到天文台都暗撐佔領行動？天文台台長岑智明就急急澄清話，佢哋喺七月已舉辦公開徵集照片活動，八月已經揀定晒相，強調與較早前獅子山被人掛上「我要真普選」巨型直幡無關。問佢有冇因直幡事件，而考慮臨時改月曆封面，佢話無，反而仲保證暢銷添。
岑智明話天文台2015年月曆同佔領行動無關。
岑智明一向都有收藏天文相片，尋日佢又向傳媒介紹「新寵兒」，就係一本有關一九○六年九月十八日颱風吹襲香港嘅風災相片集，輯錄咗五十多張由一名日本攝影師拍攝嘅相片，最近以友情價少於五位數字買番嚟。其中一張相係當年一艘法國魚雷艇遭颱風打沉，事件仲死咗幾名水手，搞到法國領事打去時任港督投訴天文台，點解無及早預測加以防範，最終時任、亦是首任天文台台長William Doberck要提早退休。唔知岑智明係咪想引以為鑑？
