政壇：張新悅極速收身唔使節食
年尾喜事多，啱啱喺九月尾誕下第三個女兒嘅楊張新悅，尋日同老公楊哲安一齊出席婦女會活動，華麗長裙盡顯佢嘅曲線身形，唔夠兩個月就極速收身，真係羨煞好多人，佢話，自己並冇刻意減肥，不過，依家要同時湊三個小朋友，真係幾辛苦。
楊哲安（左）抽空陪太太張新悅出席活動，氹得太太好開心。
張新悅話，佢不但冇減肥，反而要刻意食多啲嘢：「因為仲餵緊人奶，但飲食要好小心，例如海鮮唔知bb會唔會敏感。」佢又透露，同婦女會有個合作計劃，為工作而來，事實上，佢十一月已經全面復工，難得有老公陪同出席，她都心情靚靚，開心咁話：「佢特登嚟支持我，一陣就走。」
出席同一活動嘅仲有國際著名時裝設計師譚燕玉（Vivienne Tam），佢透露最新的春夏系列會以「故宮」為主題，為了此設計，到訪故宮無數次攞靈感，另外又設計咗「戲曲娃娃」嘅服飾，被問到是否鍾意大戲，她說：「係啊，我鍾意唱戲曲。（有冇跟老師學唱？）冇，跟我媽咪學，佢都好鍾意唱，由細聽佢唱住歌做嘢。」
