佔領行動撕裂社會,連社交網站嘅資訊流通都受到影響,日前,立法會議員鍾樹根先投訴,佢因為喺facebook(fb)「unfriend(取消交友)」咗部分粗口橫飛嘅「黃絲帶」支持者,結果,兩個fb帳戶都被無故刪除,點知受害人遠唔止佢,佢嘅幾個黨友陳克勤、蔣麗芸(Ann)同葛珮帆(EQ)都曾被刪除fb帳戶,事件究竟係被報復?定係涉被「封殺」﹖佢哋都好想知,決定去信fb要求解釋,甚至話去fb香港辦公室踩場,勢要抗爭到底。

設計圖片

克勤供個人資料「復活」

樹根因為被刪除戶口,搞到萬多個朋友失去聯絡,惟有另開戶口尋求復活,咁佢啲黨友又點呢?克勤話,兩、三個星期前,佢都被fb封鎖咗個人帳戶,仲要佢提供個人資料、核實身份先畀佢開番。

不過,克勤就唔想將身份證資料交畀fb,所以就攞咗張同樣有照片及姓名嘅惠州市政協證件頂替,fb最後都收貨,克勤先唔使冇咗二千個「朋友」咁慘。

克勤就估計自己被「封殺」嘅原因,可能係佢早前喺fb嘅言論得罪咗「黃絲帶」有關,佢認為,任何人都唔應該阻礙其他人嘅言論自由。同樣都有多個fb帳戶嘅阿Ann同EQ,早前都試過被刪除帳戶。

或到fb香港辦公室踩場

阿Ann話,佢被刪除嘅帳戶平時都好少用,所以都唔理喇。不過,被fb刪除咗三個帳戶嘅EQ就決定唔再「啞忍」,去信質問fb,對於帳戶被刪除感到十分不解,要求重開佢同黨友嘅帳戶,仲話要同fb集團會面,了解fb係點樣處理政治人物嘅fb帳戶添。民建聯都計劃開記者會講述事件,不排除到fb香港辦公室踩場,與fb大作戰。究竟係個黨被fb打壓,定係另有原因,真係要fb解釋吓先得喇。

第一手消息請下載on.cc東網iPhone/iPad/Android/Windows Phone Apps