胡適曾寫下《差不多先生傳》,諷刺國人做事馬虎又兒戲。估唔到百年後嘅今時今日,港產官僚盡得差不多先生真傳,做嘢求求其其之餘,仲衰到見到棺材都唔流眼淚,明知都市炸彈遍地開花,隨時搞出人命,一樣懶懶閒是是但但,問你服未。

講起都市炸彈,又點止冧樹冧樓冧招牌咁簡單,行行吓街一樣可以跌落無底黑洞嘅咋。呢,日前銅鑼灣渣甸街行人路驚現路陷,男途人跌落四米深地洞,執番條命算好彩喇。見過鬼怕黑,照計路政署點都會亡羊補牢啩?冇錯,路政署係就係補番個窿,仲裝模作樣撬開行人路磚探測及鑽取石屎化驗添,不過只係得個樣,隨時慘劇重演嘅咋。

點解咁講?無他嘅,之唔係路政署好做唔做,死都唔肯加鋪鐵絲網囉。正如專家話齋,路陷同水土流失有關,尤其喺現場附近有地盤進行挖地基工程,不斷抽走地下水,好大機會連周邊嘅泥沙都抽走埋,形成中空,當地面承受唔住壓力,自然就會崩塌。要補救唔係冇辦法嘅,只要喺行人路磚底下加鋪鐵絲網就搞掂嘞,事關鐵絲網有承托力,就算遇到水土流失,鐵絲網會受壓向下彎,令路面出現輕微凹陷,途人易於察覺,咁就可以防患於未然喇。

咪以為加鋪鐵絲網好複雜呀,其實現時部分混凝土行人路及馬路都有咁做,成本只係增加一成左右。你話嘞,鋪設鐵絲網只係舉手之勞,亦有慣例可循,路政署咁都要懶得就懶,有冇搞錯呀?最離譜嘅係,今次渣甸街出事,路政署求其灌石屎漿就算,仲話國際標準冇要求加鋪鐵絲網喎。咁就好笑嘞,道路保養已經做得差過人,仲學咩人講國際標準吖,明知有問題仲死雞撐飯蓋,根本係草菅人命咋!

仲有呀,家陣基建工程唔係少數,當局監管又形同虛設,全港有幾多隱形陷阱根本冇人知。嗱,唔係危言聳聽,本報記者聯同專家到路陷現場用紅外線熱能探測器偵測地底情況,赫然發現附近馬路及行人路有最少兩處地底出現高溫,顯示有水土流失情況,分分鐘再次路陷都有之,你話唔驚就假咯。

所以話,港產官僚個個差不多先生上身,香港仲邊有運行吖。早前北京朝陽區路陷,搞到半間屋墮入深坑,唔通香港真係要死人冧樓,港產官僚先肯做嘢?叮!

第一手消息請下載on.cc東網iPhone/iPad/Android/Windows Phone Apps