城中鏡：許曉暉借《無怨道》籲抗逆
中國傳統戲曲有唔少精品，崑劇係其中一項，但喺香港就似乎相對冷門，不過，有心推廣者仍然唔少。篤信佛教嘅潮州商會副會長高佩璇（Winnie），日前邀請一眾好友齊欣賞由佛典《十奢王緣》改編成的崑劇《無怨道》。該劇以遇苦無怨的精神為主旨，民政事務局副局長許曉暉（Florence）就借該戲論時局，寄語港人縱遇上逆境，仍要堅忍、包容、心不亂，又祝願香港盡快恢復社會秩序。
改編自佛經的崑劇《無怨道》，寓意人生面對逆境時，仍要心無怨恨。（受訪者提供）
高佩璇（左）與許曉暉食齋後齊齊欣賞崑劇，睇得津津有味。
梁劉柔芬（右）話想睇崑劇，身旁梁孔德即做好丈夫陪佢坐足全場。
《無怨道》一連三日在志蓮淨苑內嘅志蓮中心禮堂公演，首演當日，Winnie約埋Florence先食齋菜，然後再睇戲。原來Florence係崑劇發燒友，幾年前初次接觸，一睇上癮。兩個女兒都陪佢睇埋一份。今次《無怨道》故事屬百分百原創，更加值得支持喎。
Winnie就話，崑劇早已被列入世界非物質文化遺產，好值得推廣。佢睇完齣戲後有感而發，話人生中難免遇上逆境，但低潮時，要心無怨恨，在艱苦歷練中修養心性。其實志蓮淨苑過去兩年都有推出以佛教釋怨為題材的崑劇，包括前年的《未生怨》，以及去年的《解怨記》，意旨亦是同出一轍。
梁劉柔芬講佛偈
經常在志蓮淨苑做義工的前立法會議員梁劉柔芬（Sophie）同丈夫梁孔德都拍拖去睇戲。Sophie趁機講吓佛偈，話人生變幻無常，香港正處於重重紛擾中，希望大家學會以「無怨」來「釋怨」。佢話中含有玄機，唔知大家聽唔聽得明呢？
