設計圖片及對白
工展會係年尾盛事，今年受到持續近兩個月嘅佔領行動影響，好多商戶叫苦連天，負責營辦工展會嘅中華廠商聯合會（廠商會）本來都好擔心銅鑼灣人流疏落，令廠商參展意欲大大降低，負責工展會嘅廠商會副會長吳永嘉（Jimmy）話，為咗吸引更多人流，廠商會出盡法寶，除咗租金加幅維持喺單位數字，其他成本就由廠商會一力承擔，又準備搞個大抽獎同買一送一門票優惠，結果攤位超額報名，真係招牌都省到立立靚呀！
參展商戶不跌反升
今年廠商會都遇上了唔少嘅憂慮，首先係康文署嗰關，一度擔心會被大幅加租，好彩維持舊制；其次係佔領行動持續，廠商會起初好擔心銅鑼灣都有佔領行動，以為市民唔敢到銅鑼灣去消費，參展商為咗封蝕本門，都寧願退租好過。
點知實況同佢哋估計剛剛相反，班商戶可能因為近期生意慘淡，反而希望趁工展會博番一鋪，諗住喺年尾盡賺現金，補番條數，所以唔單止無參展商退租，報名數目仲不跌反升，反應仲熱烈過之前幾年。
不過，Jimmy都話，今年首三季嘅普遍零售業市道都已經係麻麻哋，持續多日嘅佔領行動又令到唔少中小企受到雙重打擊，希望工展會可以幫到班參展商喇。
第一手消息請下載on.cc東網
