現時有唔少諮詢組織同公營機構淪為口水會,好大程度都同成員有關。唔少人被委任做呢啲公職後,都好畀心機開會,仲努力準備好多背景資料,但如果捉唔到重點,長篇大論兼夾口水多過茶,分分鐘會令人反感。最近政圈就流傳,前行政會議成員林奮強就係呢類人士,無論喺機場管理局或大嶼山發展諮詢委員會都惹人不滿。

林奮強

話說有次機管局某委員會開會,原訂會議時間係四十五分鐘,大家輪流發言都好哋哋,但林奮強一坐低,就向其他人派發背景資料。咁梗係好啦,但點知佢話要講四十分鐘喎,即刻搞到其他委員想走人,好彩委員會主席講明只畀佢發言五分鐘,可惜佢講足五分鐘都未到重點,結果當然無人知佢想講乜啦。

另一個係大嶼山發展諮詢委員會,聽聞林奮強喺入面一係就好長氣,一係離晒題,唔知同大嶼山發展有乜關係,其他委員看在眼內唔出聲,但就試過在會議期間「睥實」林奮強。對於呢啲指控,我哋都搵過畀林奮強問佢點睇,但佢電話就長期無人聽。

第一手消息請下載on.cc東網iPhone/iPad/Android/Windows Phone Apps