政壇：李小加心情靚大派簽名首日封
千呼萬喚始出來嘅滬港通已經落實，但開局反應麻麻，好多人都跌眼鏡，不過，港交所行政總裁李小加似乎心情冇受影響，尋日出席一個飯局時，仲好high咁應大家要求，逐一喺港交所送嘅滬港通紀念首日封度簽上大名，嘩，小加好有星味喎。
滬港通落實，李小加真係開心到好似多個BB咁。
港交所為咗紀念滬港通成功推出，發行咗幾百份滬港通首日封同郵票，由於數量有限，真係有錢都買唔到，唔知再加個小加總裁嘅簽名，可唔可以將價錢再「炒高」啲呢？李小加尋日簽完名之後，仲主動攞起手機出來show埋全家福，包括太太、老大（大女）、老二（大仔）及老三（孻女）嘅玉照畀大家睇，仲話老大、老二已經讀大學。
港交所主席周松崗早前爆料話小加總裁去不丹旅行，但因為滬港通，要突然腰斬旅程，撇下妻兒趕返香港開會。聖誕節長假期，小加話會再出遊，但今次會去比較暖嘅地方，過火熱聖誕。
