政壇：趙世曾投資睇淡股票
投資瓣數多，唔同嘅人有唔同嘅選擇，卓能集團主席趙世曾就話，根據多年嘅投資經驗，發現投資古董嘅回報仲和味過股票好多，但講到藝術品嘅升值及搵錢能力，佢又覺得未必追得到地產，咁即係地產最好搵噃。
趙世曾話，投資古董比投資股票更好。（資料圖片）
上個月遭賊仔光顧嘅趙苑，爆竊損失過千萬元，趙世曾話，依家「屋企值錢嘅已經拎走晒！再冇值錢嘢」。為免夜長夢多，兼且因為多得滯，怕自己睇唔晒，佢仲已經賣咗三分一嘅珍藏古董，索性套現多啲錢起樓好過喎。事後，佢又請多幾個保安，巡多啲，又請防盜公司幫手，全面加強保安。講到投資心得，對古董好有研究嘅佢話：「幾十年前買個古董幾千蚊，依家已升值至幾百萬。」不過，即使升值不菲，都冇地產咁好搵，所以，即使滬港通開通，佢都唔多掂股票。
城中依家最矚目嘅事似乎係佔領行動，趙世曾話，香港有七成人都唔贊成，佔落去都冇意思，希望「快啲結束，快啲好世界。」
