政壇：阿Ann請職員赴台觀選戰

台灣將會在本月底舉行俗稱「九合一選舉」嘅地方公職人員選舉，呢場選舉被視為一六年台灣總統大選嘅前哨戰，包括台北在內嘅幾個地區選情最受到關注。適逢香港未來兩年會進行區議會及立法會嘅選舉，唔少政黨都計劃拉隊過去台灣觀戰，立法會議員蔣麗芸（阿Ann）更幾乎請晒成個議辦嘅職員去台北「偷師」，真係相當大手筆。

台灣選舉氣氛一向濃厚，為求爭取選民支持，藍綠陣營拉票，可謂各出奇謀。雖然民建聯之前都去過台中睇兩黨備戰，但都唔及阿Ann自掏腰包請晒二十位辦事處職員去台北咁闊綽。

阿Ann話，作為政黨員工，應該要去睇吓其他地方嘅選舉情況，到自己選舉時，就會更得心應手。佢仲話，使幾多錢都無所謂，最緊要就係班員工學到嘢喎。

至於白鴿黨黨主席劉慧卿同單仲偕等人就喺選舉前兩日飛去台北，而公民黨陳淑莊同「飛機師」譚文豪就會帶埋一班社區主任分別飛去台北同台中，估計夾埋都有幾十人。