政壇：青年委會開會急散水
近年嘅示威活動出現咗唔少八、九十後嘅新面孔，持續咗五十幾日嘅佔領行動更加由年輕一代主導，唔少人都話年輕族群怨氣大，批評港府嘅青年政策同工作都唔足夠。其實，政府都成立咗個負責青年事務嘅青年事務委員會，近年仲專登加入一批後生委員，希望年輕化、幫助解決吓青年群嘅問題。不過，呢個委員會每個年度只係開四次會，最近一次會議仲離譜，只係開咗短短半個鐘就散水，仲有唔少成員缺席添。唔知主席陳振彬（Bunny）面對咁多空櫈，有乜板斧呢？
設計圖片及對白
青年事務委員會喺本周二（十八日）舉行會議，即本年度第四次會議，今次議程包括交代委員會轄下四個工作小組（國際交流及會議、青年內地交流及實習、青年研究及發展政策、青年活動統籌委員會）嘅工作進度；交代青年發展政策聚焦小組、青年高峰會議二○一四籌備委員會嘅進度報告等。
Bunny稱曾落區了解民情
咪睇議程好似好繁複，但其實會議流程就好流水作業式，Bunny喺每個議題之後，都循例問下委員有咩意見，但佢哋都冇咩異議，所以會議話咁快就完咗嘞。唔知大家有冇留意到，今次會議完全冇任何關於佔領行動嘅內容，下次再開會已經係明年二月嘅事，到時佔領行動都唔知發展到咩地步。問到Bunny有冇諗過佔領行動點收科，佢就話有落過去旺角同金鐘，仲同啲後生仔有傾有講。至於點樣滿足佢哋真普選訴求，Bunny話會加強溝通平台，了解多啲佢哋嘅訴求，但溝通過唔代表一定會依照佢哋嘅意願去做喎！
Bunny又話，普選冇真假之分，呼籲年輕人放眼世界，因為社會由唔同階層組成，唔淨只得年輕人。另一名委員龍子明就話，留意到佔中嘅學生喺呢幾十日變得好激進，叫價太高，希望佔領行動快啲結束。青委會雖然專責青年事務，但就傾都冇傾最矚目嘅青年活動，好多委員又缺席，或預告唔出席會議，照呢種運作方式，點解決青年族嘅林林總總問題呢？政府好多時被批評成立個組織就外判責任，唔知青委會係咪其中一個呢？
