政府涼薄政客賤 老無所養有誰憐
尋日係長者日，又係星期日，唔少長者都會同屋企人飲茶敍吓天倫，不過有百幾名長者嘅假日節目唔係上茶樓，而係上街遊行請願，要求港府盡快落實全民退休保障。
點解公公婆婆有自唔在攞苦嚟辛，走上街頭爭取權益？只要睇吓本港人口結構就明o架嘞。呢，勞工及福利局局長張建宗尋日發表網誌，話六十五歲以上嘅人口，將會由依家嘅一百零七萬，逐步增加至二○四一年嘅二百五十六萬人，到時每三個香港人就有一個係長者，都咪話唔得人驚。
即係咁，長者比例愈來愈高，安老開支水漲船高，照計梗係未雨綢繆，盡快推行全民退保啦，不過張局長就唔係咁睇嘞。佢話雖然長者多咗，但係當中好多仲係健康活躍，加上教育程度提高，可以創造有潛力嘅銀髮市場，至於嗰啲過早退休嘅長者，更加係寶貴嘅人力資源喎。大家如果唔怕悶嘅話，可以睇吓呢篇鴻文，裏面通篇吹噓長者卡有幾多優惠，銀髮市場有幾可為，就係絕口唔提全民退保。咁即係點，即係第時閣下老咗，有錢嘅就幫手推動消費，冇錢嘅唔該捱多幾年世界，旨意政府養老，慳番啖氣暖肚好過咯。
大家有眼見，全民退保討論咗幾十年，港府一味拖得就拖，拖唔落去就將個波大腳傳中，委託學者做研究報告，然後自己匿埋幕後，坐視各界拗餐飽，搞到負責報告嘅學者心灰意冷，大嘆白費心機。嗱，港府對推動全民退保本來就唔嗲唔吊o架啦，撞正家陣佔領亂局尾大不掉，全社會耽於政治爭拗，經濟民生無人過問，至於全民退保咯喎，連討論都嫌費事，仲唔樂得翹埋雙手關人個關咩。
最大鑊嘅係，全民退保固然遙遙無期，出年增加長者生活津貼同生果金，亦隨時出現變數。呢兩項撥款本應上個立法年度處理，點知因為反對派大搞不合作運動，透過「拉布」癱瘓施政，到依家仲排緊隊，幾時過到關，只有天曉得。
唉，難為啲政客平時口口聲聲為民請命，好似好大義凜然咁，其實為達個人政治目的無所不用其極，不惜犧牲市民福祉不特止，家陣連公公婆婆都蝦埋，你話幾咁無良吖。港府仲寄望反對派拉布適可而止，放行長生津同生果金撥款，真係發夢冇咁早啦。
一句講晒，政府涼薄，政客無良，市民無辜，長者受害，香港冇運行，叮！
