城中鏡：法網球手創紀錄 連打33個鐘行善
由「運動燃希望基金」創辦人及主席Marie利蘊珍舉辦嘅一連兩日網球比賽慈善籌款喺尋日圓滿結束，佢話暫未統計到善款數字，但希望可用善款幫助有需要嘅小朋友發展運動才能。
利蘊珍（右）一直幫J‧利干迪打氣，三十幾個鐘冇瞓過。
Marie又興奮透露，代表基金出戰嘅法籍職業網球員J.利干迪（Jerome Lacorte）已創下新健力士世界紀錄「網球單打最多連續打對手」，佢話：「由尋日朝早七點打到依家，打咗成三十三個鐘冇停過，而我就一直喺度幫佢打氣，三十幾個鐘冇瞓過，頭先都有落場同佢打咗一個鐘。」
J.利干迪就為打破紀錄大感高興，話：「其實當中有啲難度，我喺凌晨二時至五時就感到最困難，因為好攰，而且腳冇力跑同右手亦有拉傷現象，不過整體感覺良好。」
