城中鏡：楊婉儀助「言」起行
前港姐冠軍Winnie楊婉儀同家人一齊出席慈善活動，原來佢支持呢個慈善步行活動好多年，又話：「因為依家香港好注重兩文三語，但其實好多人同家長都唔知點去評估自己小朋友語言能力，點樣先可以幫到小朋友語言方面更好，而呢個機構好照顧小朋友需要，又會做好多探訪，所以我一直都好支持。」佢又話除咗參加步行籌款，自己設立嘅基金亦會經常收集禮物嚟派畀小朋友。
楊婉儀一家四口主要以英文溝通。
問到仔女講乜嘢語言時，佢就話仔女主要以英文溝通，又話：「因為我本身母語係英文，老公又係講英文，所以當初冇諗過要同佢哋講乜嘢語言就講英文，佢哋依家係講英文、普通話同廣東話，好彩當初有婆婆同我哋一齊移民先有人同佢哋講中文，而佢哋嘅中文都流利，不過冇英文咁好，佢哋會諗咗英文先再轉，語言聯合國咁。」
