城中鏡：政商界大召集 開戲撐正生
為協助大嶼山基督教正生書院籌款改善校舍，匯聚資訊科技界（IT）及會計界專才的「資訊財務師協會」就諗出拍戲呢招。該會創會會長Sammy蘇耀經，近日號召政商界名人幫手開戲，除獲立法會資訊科技界前議員譚偉豪借出豪宅作拍攝場地外，更獲工業總會前主席鍾志平同中華出入口商會會長莊成鑫等人「科水」支持。
蘇耀經（左）獲鍾志平（右）捐錢贊助開拍勵志電影，為正生書院籌款。
譚偉豪借出豪宅供演員拍戲。（受訪者提供）
IT人李煥明（左）同呂志豪（右）出錢出力拍戲為正生書院籌款。
譚偉豪借出豪宅拍攝
本身係微電影發燒友嘅Sammy，暑期曾經到訪正生書院，睇見校舍破落大為感觸，於是夥拍總幹事呂志豪拍番齣戲。為慳錢，Sammy擔起監製兼出品人角色，仲狂碌「人情卡」，台前幕後搵來逾百人參演，當中不乏獲獎無數嘅資深電影人。不過為慈善，由策劃、導演至演員都只收「友情價」。
好似譚偉豪就借出豪宅一天作為拍攝場地，點知由朝拍到深夜十一點鐘都仲未收工，差啲令佢無家可歸。Autodesk台灣、香港暨澳門總經理李煥明就擔任音樂總監，為齣戲創作兩首主題曲。互聯網專業協會會長洪為民就搵來合和實業董事總經理胡文新，免費借出場地搞首映，認真唔話得。
今次齣戲嘅題材屬勵志電影，講述唔同環境成長嘅男女主角，因為各自做錯人生抉擇，差啲賠上前途，但係經歷挫折之後重新出發。唔少名人睇過試片後都話有意義，已準備「包場」請朋友睇戲，順便做善事。
