審計署喺年初踢爆盛事基金帳目混亂，並指有份申請撥款嘅元旦龍獅節活動，在創造就業人數方面「報大數」，又被踢爆擅自將剩餘撥款退還予贊助商，變相令到政府蒙受損失，結果搞出個大頭佛。龍獅節籌委會召集人「橄欖」陳鑑林諗住明年元旦再添食，但至今仍未向盛事基金申請撥款，據聞寧願將活動規模縮水，並四出「撲水」搵贊助商捐錢補番條數，莫非見過鬼怕黑？

設計圖片及對白

盛事基金撥款準則恐提高

經審計署同立法會政府帳目委員會連番發炮後，橄欖搞龍獅節冇好似以前咁高調，只係低調喺官方網頁宣布，會繼續喺明年元旦舉行。不過，據有份搞龍獅節嘅人透露，來年龍獅節規模會比以往細得多，以前有電視直播，又話創乜嘢世界紀錄咁，嚟緊只係預計喺尖沙咀搞個嘉年華就算數。不過，細搞還細搞，使費仍要約一百萬元，所以籌委會仍頭痛緊，要周圍撲水搵贊助。我哋曾經多次聯絡橄欖，諗住問清楚來年龍獅節嘅活動詳情，但始終未能聯絡上。

另一邊廂，有傳聞話盛事基金怕再搞出大頭佛，所以收緊申請撥款準則，等一眾質素未達標嘅活動申請可以自動收檔。盛事基金評審委員會主席林健鋒話，現階段唔能夠透露有乜項目申請緊基金，但所有申請審核仍然進行中，唔會因審計署同帳委會炮轟後，就停止接收申請。佢仲話下月評審委員會開會，預計新一輪嘅遴選結果好快出爐。

第一手消息請下載on.cc東網iPhone/iPad/Android/Windows Phone Apps