做義工除咗要有愛心，仲要有幾招絕技傍身。近日天氣轉涼，中電總裁Paul Sir潘偉賢就聯同企業發展總裁莊偉茵、社會福利署署長葉文娟、立法會議員梁志祥同一班弱能和精神病康復學員夥伴，齊齊用碎花布合力縫拼「百家被」，送畀四百名參加活動嘅「老友記」，為佢哋冬天添溫暖。咪以為男士做針黹就會「姐手姐腳」，原來手藝絕對唔比女士遜色。

莊偉茵（左起）、葉文娟同潘偉賢齊齊落手縫製「百家被」送贈長者。（受訪者提供）

Paul Sir除咗做針黹了得外，尋日仲憶起做義工時的難忘片段。佢話二十年前踏足馬鞍山時，當地有一個礦場，礦場結束營運後，唔少礦工仍留在山上聚居，當地就好似一個被遺忘的孤島。佢哋一班員工其後在該區進行駁電工程時，見居民生活環境惡劣，電力設備破舊，擔心釀成火災，於是自發免費為居民重鋪電線，還合資購買電器送上門，佢希望呢份熱情和精神能夠延續下去喎。

第一手消息請下載on.cc東網iPhone/iPad/Android/Windows Phone Apps