除咗預防流感同登革熱之外，好多人亦關注伊波拉病毒擴散嘅情況。佛學動力文化藝術基金會日前喺維園舉辦「香港曬佛節」，都係以對抗伊波拉疫情為主題。不過，主禮嘉賓之一嘅前立法會議員、現任東區區議員「蔡菜子」蔡素玉就一啲都唔擔心，仲啱啱帶家人去完非洲納米比亞等地返港添！

蔡素玉唔怕伊波拉疫情蔓延，照同家人去非洲旅行。（受訪者提供）

蔡菜子話計劃前往非洲時，並未爆發伊波拉，後來知道伊波拉起源於西非，遠離佢哋去嘅中非同東非，所以就決定起行。佢話根據舊年觀賞動物大遷徙嘅經驗，知道當地陸路交通唔方便，所以佢哋一行六人自己組團，包車周圍去。為以防萬一，佢哋事前亦買咗保險，若目的地成疫區，而令行程縮短或取消，都可以獲得賠償。

今次佢哋除咗睇野生動物外，仲遊覽咗維多利亞瀑布、紅沙漠同石化森林等。蔡菜子話喺當地見到唔少參天巨木，但原來全部都係化石嚟，印象深刻，又食咗當地人狩獵回來的羚羊同野豬，係咁大個人第一次食喎。

第一手消息請下載on.cc東網iPhone/iPad/Android/Windows Phone Apps