政壇：鴿黨副主席位冇人吼？
白鴿黨將於下月換屆，重新選出正、副主席等職位。由於往後兩年將舉行區議會同立法會兩場重要選舉，再加上臨近政改投票關鍵時刻，預計現任黨主席劉慧卿將會連任穩住軍心。雖然副主席羅健熙如無意外都會連任，但另一位副主席蔡耀昌就表明會裸退白鴿黨黨務，加上立法會議員「單雞」單仲偕無意競逐副主席，睇怕會掀起一場副主席爭奪戰。
設計圖片及對白
蔡耀昌喺今屆立法會選舉慘敗，但難得個黨仍然對佢不離不棄，除咗畀佢擔任黨副主席外，仲畀機會佢捲土重來，出戰下屆新界東直選。不過，由於該黨總幹事林卓廷都係出選新界東另一人選，有傳兩人就因為爭地盤起衝突，加上蔡耀昌喺新移民領取綜援一事中，辣唔少本土派，令佢喺區內支持度愈嚟愈低，無奈以照顧家庭為由，逐步淡出白鴿黨。
黃碧雲稱專心立會事務
至於單雞，前年本來一度係主席大熱人選，但最終以十六票輸畀卿姐，如果佢唔選主席，改選副主席，相信幾乎做硬咁滯。不過，我哋問過單雞，佢話今屆無意競逐黨內任何職位，亦會將權力逐步下放畀其他後生仔。唔單止咁，外間亦傳佢連立法會都唔選，莫非想好似李華明咁，全裸退搵真銀？
既然蔡耀昌同單雞決定唔選副主席，咁該黨就要再物色過另一位副主席。據聞黨內認為立法會九龍西議員黃碧雲同葵青區議員尹兆堅有能力問鼎副主席一職，但黃碧雲話自己想繼續專注立法會事務，而尹兆堅就坦言近日有人不斷游說佢出選副主席，但佢仍然考慮緊，下星期前會決定係咪報名參加喎。副主席之位最終花落誰家？相信好快就有分曉。
