議會垃圾唔清除 三堆一爐怎過關
俗語話好事多磨，「三堆一爐」係咪好事，見仁見智，但多磨就肯定o架喇。呢，立法會財委會前日第三度審議撥款申請，結果一如所料，喺反對派議員重施拉布故技之下，又係未能表決，下周再續。
同之前兩次一樣，反對派議員一方面提出休會動議，一方面以輪流發言方式拖時間，搞到會議開足兩節共四粒鐘都係得個吉。當然喇，欲拉之布，何患無詞，反對派政客梗係有歪理嘅，佢哋話當局恃住夠票通過就「硬闖」財委會喎。其實，依家唔係夠唔夠票嘅問題，而係三堆一爐有冇需要嘅問題，垃圾圍城迫在眉睫，立法會仲喺度拉布，政客仲喺度講廢話，簡直離晒大譜。
講起三堆一爐，都唔知係咪改錯名，果然係一波三折。由規劃到依家，前後已拖咗十幾年，淨係立法會都唔知討論咗幾多次，次次都係得個嘈字，唔知幾時至可以落實。冇計喇，行政立法關係惡劣，政客為反對而反對，為拉布而拉布，又點會考慮三堆一爐係咪有迫切性吖。
最好笑嘅係，有人為咗阻撓三堆一爐，竟然異想天開要求中央出面，協調珠海撥個孤島畀香港興建「垃圾島」喎。你話係咪大諗頭吖？己所不欲，勿施於人，香港問題香港解決，香港垃圾梗係香港處理喇，自己唔要嘅垃圾有乜理由推畀人哋呢？咁嘅說話都講得出，唔止自私，而且無知，盞唔衰攞嚟衰嘅咋。
話時話，固體廢物問題積重難返，已經瀕臨爆煲，再唔解決咯喎，垃圾圍城一啲都唔出奇o架。呢，三個堆填區未來幾年就會陸續爆滿，源頭減廢又雷聲大雨點小，等到真正見到成效，正一蚊都瞓，蛇都死，你話點算呢？
唔係靠嚇o架，垃圾圍城已經進入倒數期，三堆一爐愈遲落實，香港就愈快變臭港，問題唔可以無了期咁拖落去，反對派政客等得，港產官僚等得，香港已經唔等得！
所以話，慶父不死，魯難未已。反對派為咗搞亂香港，癱瘓港府施政，置七百萬市民福祉於不顧，無所不用其極，搞到大量民生議題受阻，又點止三堆一爐過唔到關吖。佢哋有破壞冇建設，將議事堂變成鬥獸場，立法會烏煙瘴氣，已經淪為名副其實嘅「垃圾會」。計太一叮話齋，如果唔清除呢班議會垃圾，唔止三堆一爐厄運難逃，成個香港都唔會有運行o架，叮！
