政壇：搞搞政：民主動力唔夠力 乳鴿坐莊得啖笑
由多個泛民黨派及團體組成嘅民主動力，成立超過十年，但近年泛民派系漸多，民主動力淪為協調選舉機器，連網頁都成兩年冇更新過最新消息，苟延殘喘嘅民主動力近日傳嚟改選之聲，白鴿黨東區區議員趙家賢接替鄭宇碩出任新召集人，趙係乳鴿一名，遇上選區協調會唔會有利益衝突呢？結果，最後泛民陣營都係決定由鄭宇碩繼續處理選區協調工作，乳鴿坐莊，但就唔使做全套，呢個安排真係得啖笑。
設計圖片及對白
稱將大搞活動及論壇
趙家賢係白鴿黨區議員，為免白鴿黨被質疑，副召集人鄭宇碩都係要頂硬上，繼續處理選區協調工作，之後再交番畀趙家賢處理選舉部署同宣傳工作。不過，區選四年先至舉行一次，如果連協調選舉工作都做唔到，真係唔知仲有咩做嘞。趙家賢就話，希望民主動力以後唔再負責區選協調咁簡單，又透露日後會大搞選民登記活動及地區論壇，令政黨新人有更多論政機會喎。
本身係調解員嘅趙家賢仲話，希望可以化解泛民黨派之間嘅恩怨添。不過，白鴿黨同新民主同盟就區選搶區一事積埋咁多牙齒印，加上白鴿黨自一○年支持政改一役後，已被社民連及人民力量等激進派狙擊，睇怕都無乜可能可以化解到喇，分分鐘要鄭宇碩掉轉頭幫佢調解恩怨都未定。
