政壇：大專辯論正方勝預示佔領見好就收

有電台亦湊熱鬧，舉辦大專普通話辯論賽，以「佔領行動應該見好就收」作為辯題，由進身總決賽嘅中文大學與浸會大學進行激辯，更邀請立法會主席曾鈺成、資深大律師胡漢清、律政司副法律草擬專員（雙語草擬及行政）毛錫強、大律師公會執委譚允芝等人出任評判。評判團最後都係揀咗正方嘅中大奪得冠軍，唔通結果真係預示佔領行動「見好就收」？

代表正方、即贊同佔領行動「見好就收」嘅中大同學指出，佔領行動由逾萬人跌至四、五百人，而整場行動亦開始四分五裂，與其堅守立場卻損害其他人利益，不如考慮其他可行、合法嘅方法爭取真普選。浸大同學反駁佔領行動未見成效，認為應該留守至警方採取拘捕，以達到公民抗命目的。

評判團嘅評分準則係咩冇人會知，但曾鈺成、譚允芝所屬嘅大律師公會都曾經公開發表應該適時結束佔領行動嘅言論，今次咁啱由持相同意見嘅中大勝出，難免予人感覺勝出係因為同聲同氣。曾鈺成早知有呢一着，公布結果前「笠定頭盔」，講明「冠軍隊伍立場不代表評判團」喎。