政壇：陳日君黑面拒祝福學聯
學聯四子昨午「闖京」上訪，一如所料，敗北而回。咁佢哋出發前夕，天主教香港教區前主教陳日君同佔中發起人之一嘅朱耀明，咁啱雙雙出席「司徒華教育基金」頒獎禮，當然要問吓兩人點睇學聯上京啦。不過，陳日君聞言後，隨即收起笑容，只簡短重複「唔講、唔講」，而笑口常開嘅朱牧就維持一貫笑容，但繼續唔回應，只係話「今日只講頒獎禮嘅嘢」，拒絕「祝福」或鼓勵原定上京嘅學聯四子。
陳日君（右）黑面、朱耀明（左）笑晒，封口不談學聯上京。中為教協副會長馮碧儀。
事實上，陳日君上月初已經寫信畀學聯及學民思潮，指佢哋同佔中三子之間嘅溝通出問題，其後更公開批評學聯「行錯路」、學民思潮召集人黃之鋒不智，態度明顯唔同晒。至於年初不惜藉「擺大壽」為佔中撲水嘅朱牧亦明顯靜咗，不但鮮有現身金鐘佔領區，近日亦冇再發表任何支持或鼓勵學生嘅言論。不過，持續五十日嘅佔領行動已嚴重影響市民及多個行業，莫非兩人以為唔講嘢，就可以置身事外？
