黃竹坑警校尋日舉行見習督察及學警畢業禮，近期爆紅嘅警察公共關係科總警司許鎮德（許Sir）都有現身，好多人爭住同佢影相。許Sir容光煥發、笑容滿面，仲同記者們大玩自拍，以為佢早前「息影」幾日叉足電啦，點知佢自爆由九月二十六日開始，連續五十一日都無放過假，仲畀屋企人詐型添！

許鎮德連踩五十一日，但尋日見佢未現疲態。

許Sir又話，佔領行動最初個幾星期，每日瞓得嗰兩個鐘，除咗要主持記者會，每晚仲要睇實佔領行動嘅最新發展，真係陰功。不過，佢強調呢段期間係自願加班，完全無諗過要補假，但佢話依家成個警隊都係咁，唔係淨係佢一個，希望香港盡快回復正軌。許Sir休息咁少，但皮膚仲都唔錯，佢就透露呢七個星期飲咗十五支保健飲品先至保持住個精神樣喎。

第一手消息請下載on.cc東網iPhone/iPad/Android/Windows Phone Apps