政壇：後生從政之路 父輩各有睇法
政圈已就下一屆立法會選舉展開各種部署，有團體更已展開前哨戰，中華廠商聯合會（廠商會）亦唔例外，該會立法會議席早已傳出換人之聲，會長施榮懷（Irons）及副會長吳永嘉（Jimmy）都被視為競逐嘅熱門人選，尋日佢哋嘅父輩、同屬福建幫頭領嘅施子清及盧文端不約而同開腔，講到兩個後生從政之路，佢哋就各有睇法，睇嚟，Irons同Jimmy要闖政壇路，喺廠商會同屋企都要過唔少關至得！
設計圖片
沙田馬場尋日舉行盃賽，唔少政商界名人入場輕鬆吓，Jimmy外父盧文端話，邊個代表廠商會躋身立法會仍言之尚早，依家仍未知邊個會出線，佢話：「可能施榮懷想出呢？」不過，盧文端都首次鬆口話：「做議員可以考慮嘅。」
施子清憂兒子成箭靶
傳聞幾年前有某政策局想搵Jimmy做副局長，但遭盧文端反對；尋日盧不諱言依家做官好難，成日被人鬧，做議員就可以考慮，起碼冇咁困身喎！咁又係，議員仲可以鬧官添！盧文端聽罷哈哈大笑。
盧文端的結拜兄弟兼Irons父親施子清現身，佢一聽到Irons可能有意參選立法會議員，即皺眉表態唔贊成，因為做議員，個個都被人鬧，而且做議員對佢哋家庭唔係咁適合喎！施子清仲話，Irons仍未同佢提過件事。不過，亦可能傳聞並非真確，所以Irons無提起都未定。
佢哋一提起政壇，不約而同諗到畀人鬧，驚自己家人從政成為被鬧嘅一員，可見依家嘅政治氣氛都好得人驚，有心人行入政壇，真係要克服外在嘅問題，同身邊好多人嘅恐懼至得。
