創新能力遜星洲 缺乏人才空嗟嘆
廿一世紀係科技時代，想了解一個地方嘅競爭力，睇吓有幾多科技人才就知道。香港呢方面嘅表現如何呢？唔使問阿貴，梗係令人失望喇，連作為重點科技基礎建設嘅科技園都長期請唔到人，你話香港有冇科技人才吖。
呢，科技園行政總裁馬錦星大吐苦水，話今年為園內公司舉辦招聘展覽，先至發現園內共有超過四百個空缺。點解有工冇人做？佢認為原因之一係本港大學畢業生無意喺創新科技業發展，大部分選擇投身銀行或者其他回報高嘅行業，而外資公司又因為香港冇人才，影響進駐意欲。
正所謂，人望高處，水向低流，如果喺香港搞科研有前途，大把人爭住做喇，科技園又點會請唔到人吖。係人都知，香港產業結構單一，唔係金融就係地產，好多科技人才根本無用武之地，結果唔係轉行，就係去外國發展。再講吖，港府對大學科研嘅投入似有若無，全部大學每年科研資金加埋都唔夠內地一間普通大學，你話點培養人才吖。
本來呢，自己培養唔到人才，吸引外國人才不失為可行之道。可惜，無論係專才計劃又好、優才計劃都好，多年來成效麻麻，配額長期用唔晒，搞到淪為內地名人明星出國嘅跳板。唔怕唔識貨，最怕貨比貨，同樣係彈丸之地嘅新加坡，過去十年吸納超過一百萬新移民，其中大部分係專業人士。唔怪得世界經濟論壇最近發表嘅全球最新競爭力報告，本港喺創新力排名第二十六，而新加坡就排名第九，香港簡直相形見絀。
講來講去，本港經濟結構單調嘅問題唔解決，吸引人才都係得個講字。冇錯，回歸後港府計劃多多，一時話發展優勢產業，一時話要將產業「做多做闊」，可惜有姿勢冇實際，搞來搞去得個吉。今屆政府諗住成立創新科技局亡羊補牢，弊在爭議多多，阻力重重，尤其係反對派大搞不合作運動，立法會幾乎陷於癱瘓,創科局睇怕都係凍過水嘅喇。
時間唔等人，香港掛住內鬥內耗，鄰近地區專心發展經濟，咁搞法，香港莫講話吸引人才，連本地精英都留唔住，想唔邊緣化都幾難。
始終都係嗰句啦，廿一世紀最寶貴嘅係人才，今時今日嘅香港，唔止人才外流咁簡單，直頭係人才外逃。唉，無可奈何花落去，莫非百年香江真係氣數已盡？
