潮語「神回」可能會令你即時聯想到「神嘅回覆」，以前的確係有本暢銷書叫《與神對話》，基督徒亦會以祈禱同神傾偈，至於神睬唔睬，就要靠自己心領神會喇。「神回」其實係指「神級回覆」，即係一啲無懈可擊而又可以令你無話可說，達到「神級」嘅回覆。呢啲回覆可以係短訊、電郵、信件甚或係言語對話，總之可以完全將你KO擊倒嘅答案，都可稱之為「神回」。

最近WhatsApp推出咗新功能，就係每次傳短訊畀朋友都會知道對方收唔收到，同有無開過嚟睇。如果對方收到兼睇咗你發嘅訊息，你嘅手機畫面會有顯示兩個「藍剔」。即係話，對方再無藉口話自己收唔到你嘅message又或者話無睇過，呢個可以話係用嚟專門對付嗰啲吹水唔抹嘴嘅大話精。對一啲拍緊拖嘅男女嚟講，呢個新功能到底係幫你還是害你？依家好多拍拖男女經典對白係：「WhatsApp畀你做咩唔覆？你去咗邊？同邊個一齊？」、「你WhatsApp過我咩？幾時？收唔到呀……」有咗「藍剔」功能，以後就唔可以咁答，因為對方幾時幾刻收到訊息，都會清楚顯示，所以遇上對方類似嘅質詢，就要諗一啲新嘅藉口。例如係被外星人捉咗，又或者係失足跌咗入五次元空間等等。不過我覺得「點解唔覆WhatsApp？」呢類問題，最「神回」應該係：「點解你唔直接打畀我？」

網上早排流傳一段WhatsApp對話，係一個援交少女傳畀一個陌生少男，關於自己嘅服務範圍同收費，點知嗰個少男原來自己都係出賣身體，並將自己嘅服務範圍同收費當作回覆。最後，援交少男竟然提出，既然大家平時都是收費陪客上床，倒不如大家免費來一次吧！好多網民睇完都大讚援交男嘅回覆係「神回」！

學聯同學們打算就政改方案，上京表達意見。其實佢哋能否順利上到飛機去北京都成問題，我睇，除非真係有神迹，否則同學們……請回吧啦！

第一手消息請下載on.cc東網iPhone/iPad/Android/Windows Phone Apps