賣樓違規無人理 皆因監管漏洞多
樓價高企，民怨四起，連帶樓宇銷售亦問題多多，爭議不絕。呢，消委會日前揭發發展商賣樓「四宗罪」，無疑令人嘆為觀止，不過咁，如果唔係當局監管不力，漏洞百出，又點會搞成咁吖。
消委會揭發嘅四宗罪包括，售樓書又厚又重，而重要資料例如管理費就欠奉；價單不盡不實，誤導買家，變相令唧牙膏式賣樓合理化；準買家揀樓時只有三分鐘時間考慮；地產代理違規操作，誇大買樓登記數字。
正所謂，冰凍三尺，非一日之寒。呢啲售樓手法存在已久，早就唔係新聞，最奇怪嘅係，當局一直視若無睹，搞到問題不斷惡化。呢，《一手住宅物業銷售條例》已經實施年半，至今依然零檢控，銷售監管局淨係識得「勸喻」同「警告」，問你服未。
即係咁，發展商在商言商，以各種辦法促銷係無可厚非嘅，就算部分手法引起爭議，亦好難避免，關鍵係合唔合法啫。消委會承認現行法例唔完善，呢類銷售手法係利用灰色地帶喎。即係話，現行法例有漏洞喇。
當局又點解畫呢？銷售監管局一方面話尊重消委會報告，一方面又死撐指目標係提高透明度，唔係限制發展商銷售方式喎。該局專員馮建業仲反擊消委會，指完成調查嘅懷疑個案數目絕對唔少，已交律政司決定是否檢控。嗱，市民唔知當局究竟調查咗幾多個案，淨係知道樓宇銷售問題多多，呢啲唔係銷售監管局嘅責任，又係邊個嘅責任？
正如消委會話齋，本港相關法例比好多地方嚴苛，可惜重點係保護發展商，對消費者嘅保障反而嚴重不足。例如本港取消臨時買賣合約要沒收樓價百分之五訂金，而新加坡只有百分之一點二五，澳洲墨爾本更只有百分之零點二添。講到呢度，大家應該知道點解樓宇銷售會有咁多問題，當局嫌貧愛富，法例為財團而設，又點可能唔引起爭拗吖。
話時話，本港樓價係咁飆升，好多基層市民只能望樓興嘆，就算勉強儲夠錢供樓，亦隨時誤墮陷阱，講起真係無奈。唔怪得連國家領導人都話，房屋問題係社會問題，如果處理得唔好，仲會演變成政治問題。好明顯，香港嘅房屋問題早已成為政治問題，如果當局繼續闊佬懶理，連監管樓宇銷售都敷衍了事，遲早將無殼蝸牛統統逼上街嘅咋，叮！
