黑人總統喺權力榜上面又一次輸畀特工總統，真係火滾到震，加上面臨跛腳鴨施政困局，任期收尾幾年真係唔慌有好日子，喺佢身邊嘅智囊見到咁嘅情況，亦都冇晒橋，身為全球最發達國家嘅領導人竟有如此困境，慘呀。
「我覺得係針對我囉！嗱，你話吖，我着件老西啲顏色唔係咁傳統啫，又畀人笑又畀人鬧，佢個死特工幾十歲人，夠成日着到筋肉人咁行出嚟啦，又唔見笑吓佢？」黑人總統死唔服氣，係要摷嘢講，智囊惟有求其答兩句：「係囉係囉，啲人怕佢野蠻先唔笑佢啫，你睇佢平時打獵當做騷，你就知佢幾尚武啦。」黑人總統聞言大喝：「我唔識打獵咩？同我上齊架生，即刻出發！」
見到如此失態嘅總統，智囊甚感困惑，長嘆一聲道出心裏話：「打隻獅子老虎返嚟有乜用，你可唔可以三兩吓手腳打個城市返嚟，然後成個世界當冇事發生？」黑人總統畀真相激到失晒理性，又廢噏一輪：「咁好吖！同我拉人封舖，以後唔准搞權力榜，咁就冇得分高低啦！」豈料智囊大感歡喜，笑臉道：「總統先生，你終於開竅喇，識得擇優而學，箝制言論，就係重登No.1嘅好開始！」
第一手消息請下載on.cc東網十方無敵
