城中鏡：楊張新悅產後fit爆唔諗追囝囝

教育局前政治助理楊哲安嘅太太楊張新悅，尋日聯同童愛玲出席首飾活動開幕活動。剛喺四十五日前誕下第三名千金嘅楊張新悅，已明顯收身成功，仲坦言唔打算追個兒子。佢透露兩名姊姊有幫忙照顧妹妹，但笑言：「佢哋太熱情，因為BB好脆弱，好怕佢哋扭甩BB啲手仔、腳仔。」

楊張新悅（左）與童愛玲齊出席首飾活動開幕禮。

楊張新悅又透露三女取名Leah，因所有囡囡嘅名字都係四個字母，並以L作開端。佢話：「因為我同老公個名嘅字頭係J同N，L係我哋中間嘅字母，代表我哋嘅結晶品。」

至於即將生日嘅童愛玲，笑言老公從前會送電子產品畀佢，但自從佢坦誠話較喜歡首飾後，老公每年都會同佢一齊挑選首飾作為禮物。另外，早前佢同囝囝到台灣探親，但由於近日黑心油問題嚴重，令佢唔敢食最愛嘅鹽酥雞，亦分外留意食品上有冇「自炸豬油」嘅標籤。