城中鏡：樓上賣珠寶 避佔領生意好
由於佔領行動阻塞多條主幹道，令珠寶金行等零售業飽受打擊，業界士氣極低落，但另類銷售渠道似乎未受影響。百仁基金副主席Johnny楊華勇嘅太太Fiona莊菲娜家族經營嘅樓上珠寶店，早前斥資重新裝修後擴大營業，Fiona特登招呼好友上去參觀，包括恒生孫新抱Anina何倍倩同香港青聯會董潘偉業太太Akiko鄺晶晶等靚太都去趁熱鬧，Akiko仲趁機買件蝴蝶戒指獎勵自己，貪靚唔使搵理由。
香港福建同鄉會永遠名譽會長莊哲猛（右二）同太太駱英英（左二）將珠寶生意交給大女莊菲娜（左一）同細女莊莎娜（右一）。
鄺晶晶（左）全情投入揀首飾，楊華勇（中）加入畀意見。
何倍倩亦抽空到場參觀。
靚女作家親自演繹
當日係周末下午，Akiko暫時丟低老公同囡囡，隻身去捧場。佢一入場就急不及待周圍睇，興致勃勃試戴，期間Fiona胞妹Sarah莊莎娜在旁提供意見，事關Sarah係珠寶設計師，店內陳列盡係佢嘅作品。Akiko笑笑口話自從囡囡出世後已好少戴戒指，因為湊女唔方便，但當日有對蝴蝶戒指佢一戴上手就好鍾意，所以就買咗先算。
Sarah亦係90後靚女作家，最近啱啱出版第一部懸疑長篇小說《藍光人》。佢自細就鍾意睇超現實的科幻小說，尤其係沉迷於衞斯理小說。科幻世界充滿驚險與死亡，同珠寶設計看似風馬牛不相及，但小妮子話兩者相同之處就係無限的想像力。佢亦會將科幻融入珠寶設計，話口未完，佢即示範戴上一對狀似天使翅膀圖案鑽石耳環，設計意念即來自虛幻世界。
