政壇：搞搞政：提動議彈弓手 葉劉大輝有苦衷

葉劉喺前晚向立會主席提出想喺尋日嘅大會上動議一項休會待續議案，就警方協助執行高等法院三宗涉及堵塞旺角部分街道嘅禁制令進行辯論，主席已批准咗，但第二朝早九點幾，佢又突然要求撤回。雖然撤回議案令大會開會慳番幾個鐘，但一眾漏夜幫議員寫發言稿嘅助理就怨聲載道，勁呻葉劉係想玩殘佢哋。

有知情人士透露，葉劉之所以十幾個小時內急轉彎，係因為收到多方面嘅「關切」，大家都唔想立會因呢項議案而辣着佔領人士，為清場添煩添亂。據知葉劉前晚通知秘書處同政府，話會提出休會待續後，令政府中人大為緊張，某高官仲致電唔少建制派，問佢哋知唔知葉劉搞邊科，之後仲索性打畀葉劉問佢想點。不過，葉劉就話撤回議案係因為做唔切資料搜集，同有內幕消息知道警方會即將進行清場無關，又話中聯辦無就事件搵過佢傾偈。

大輝原本都提出一項題為「關注香港和內地的融合和矛盾」嘅議員議案，但上星期五又臨時決定抽起。佢解釋話係今個星期唔喺香港，所以唔可以動議議案。查實喺佔領清場前夕，中央同特區政府已夠晒忙亂，大輝仲提咁敏感嘅議題，仲唔係添煩添亂。