喺呢個年代，網絡力量超乎想像。最近就有網民雄心壯志喺網上號召各路英雄出戰明年區議會選舉，佢哋目標非常明確，就係狙擊往屆建制派自動當選嘅選區。呢班網民目的當然唔係想贏，只係想擾敵，打亂建制派自動當選嘅如意算盤。
每逢區議會選舉，泛民都處於捱打狀態，預料來年區選都係建制派天下。有網民睇唔過眼，最近忽發奇想，希望藉網絡力量狙擊一眾得來全不費工夫嘅建制派議員。佢哋仲成立一個區議會選舉專屬資料庫，入邊有齊自動當選區議員嘅得票率同競爭對手資料，仲講到明偏遠地區如新界鄉郊同離島未必派人攻打，希望群策群力主攻人口密集嘅市區。
呢個建議好受歡迎，目前最少有三十人報名話可以參選，亦有幾十人話自己未必可以拋頭露面，但可以全力做文宣等支援工作。不過，網民出晒名只講唔做，到底最終係咪成事，仍要拭目以待。
第一手消息請下載on.cc東網
