政壇：滬港通首發派對墟冚
滬港通星期一開車，呢個被喻為繼H股九三年登陸香港，相隔二十年後的另一項金融盛事，港交所自然不惜工本，搞個隆重盛大嘅開幕儀式，據聞，港交所打算邀請幾百人出席開通儀式，一齊見證呢個歷史時刻。
港交所主席周松崗（右）同行政總裁李小加會主持滬港通開通儀式。
雖然近年港交所交易大堂已改裝，舉行上市儀式嘅地方大咗，但若果到時真係有幾百人出席畀面派對，真係逼爆會場o架！
各方人士呢幾日已陸續收到港交所發出嘅英雄帖，英雄帖以「首發啟動」（first time ever）嚟形容滬港通開車，開通儀式敲定喺下周一早上九時啟動，唔知係咪吉時呢？
上交所一樣有盛大慶祝儀式，講到明係「滬港通」，兩地開通儀式自然會連線，香港可即時睇到上海嘅情況。
依家市場成日估，由於A股唔能夠做即日鮮，加上國際大戶對A股虎視眈眈，「滬股通」開波初期，每日額度好可能被「秒殺」，一、兩分鐘就爆額一啲都唔出奇，所以有口痕友話可能開通日嗰班巨頭，香檳杯都未碰完，喺開市前時段就宣布滿額要暫停。相反，「港股通」有得炒即日鮮，內地客戶又以散戶為主，見有得執少少可能就會走（沽貨），未必咁易爆額喎！
