政府委任人進入諮詢組織，一向都係政治決定，唔多唔少都會畀人質疑係咪益自己友。立法會議員黃毓民尋日向政府提出質詢，問及監警會同最低工資委員會嘅委任，兩名監警會泛民委員「一舊雲」黃碧雲同梁繼昌就分別向保安局局長黎棟國「開火」，質疑政府委任「梁粉」、撐警人士、同一政見嘅人，點知就反畀建仔嘅「橄欖」陳鑑林窒番轉頭，話佢哋兩個咪係不同政見人士，仲叫黎棟國逐一讀番監警會委員出嚟，窒到佢哋兩個應一應！

陳鑑林窒到黃碧雲（圖）應一應。

陳鑑林

一舊雲話監警會主席係政協前委員，委員又以梁粉居多，當中有人撐警，又點樣確保獨立公正。梁繼昌就話，唔知唔同政見嘅人士可唔可以被委任。黎棟國話委任「梁粉」指控，對熱心貢獻時間嘅人係絕對唔公道，仲起反作用，又反諷「事實勝於雄辯」，話監警會正正顯示，委員有唔同背景同政治光譜。

唔知係咪睇唔過眼，橄欖就窒一舊雲同梁繼昌擘大眼講大話，一舊雲即刻話對方批評唔公道，立法會主席曾鈺成都叫橄欖收回評論。橄欖就反叫黎棟國讀出委員名單，但局長亦有蝦碌，讀到馬學嘉時講到「先生」，但其實佢係女士，唔通佢對委員都唔係太熟？

第一手消息請下載on.cc東網iPhone/iPad/Android/Windows Phone Apps