政壇：馬逢國突關心佔區藝術品
喺各個佔領區現場有唔少手作工藝，例如金鐘除咗有好多帳篷，仲有木板做嘅巨人手持雨遮、獅子山模型等，變成佔領者展示創意手作嘅場所，但係呢啲係咪藝術品，就好值得商榷。曾被業界批評「不代表我」嘅立法會體育、演藝、文化及出版界議員馬逢國，早幾日失驚無神去信警務處同民政事務局，希望當局清場前早啲通知「藝術品」創作人，睇吓可唔可以自己攞走或者幫手暫存喎！馬逢國今次為創作者出聲，唔知係咪補鑊呢？
馬逢國關心佔領區內「藝術品」於清場時被破壞。
馬逢國強調唔支持佔領行動，只係因應業界訴求喎。佢又話雖然乜嘢叫做藝術品，見仁見智，好難定義，但如果值得保留，都希望藝術家可以自己攞走。咁貼上好多紙嘅連儂牆呢？佢就話現場保留不可行，加上未獲批准張貼紙張係違規，所以唔準備幫手。其實，如果創作者咁珍視呢啲「藝術品」，係咪應該自己諗掂點樣保護呢？
